Workshopi Rajonal mbi Tranzicionin drejt E-Mobilitetit, Menaxhimin e Qëndrueshëm të Lëndëve të Para Kritike dhe të Ujit,Energjisë dhe të Mineraleve

9–10 Dhjetor 2025 – Tiranë, Shqipëri

Shërbimi Gjeologjik Shqiptar, në bashkëpunim me UNECE, organizoi në Tiranë workshopin rajonal i cili mblodhi bashkë ekspertë të lëndëve të para kritike (CRM), e-mobilitetit dhe menaxhimit të burimeve natyrore.Në këtë event ishin të ftuar ekspertë të fushës së gjeoshkencave, akademia, gjeologjia etj. (FGJM, IGJEU, AKBN, EIT –Albania etj). Ky aktivitet shërbeu si një hap i rëndësishëm për forcimin e dialogut rajonal mbi sfidat dhe mundësitë që sjell tranzicioni drejt energjisë së pastër.

Si bashkë-organizator kyç, SHGJSH siguroi përgatitjen e plotë të workshop-it dhe prezantoi rolin e Shqipërisë në peizazhin europian të lëndëve të para kritike. Institucioni vuri në dukje rëndësinë strategjike të burimeve minerale dhe nevojën që ato të menaxhohen sipas standardeve ndërkombëtare, si UNFC dhe UNRMS, të cilat ofrojnë mjete të rëndësishme për klasifikimin, planifikimin afatgjatë dhe shfrytëzimin e qëndrueshëm të burimeve.

Gjatë diskutimeve, ekspertët nga rajoni ndanë përvoja dhe modele praktike mbi rolin e CRM-ve në industrinë e baterive dhe e-mobilitetin, ndërsa sesionet interaktive treguan sesi kornizat UNFC/UNRMS mund të përdoren për të marrë vendime të bazuara në të dhëna dhe për të rritur transparencën në qeverisjen e burimeve natyrore.
Workshop-i u vlerësua si një nismë frytdhënëse që fuqizon bashkëpunimin rajonal dhe afirmon Shërbimin Gjeologjik Shqiptar si institucion qendror në menaxhimin e qëndrueshëm të burimeve kritike dhe në përafrimin me praktikat ndërkombëtare.