PUNIMET FUSHORE TË SHËRBIMIT GJEOLOGJIK SHQIPTAR PËR VITIN 2024

Stafi i Shërbimit Gjeologjik Shqiptar në kuadër të zbatimit të projekteve të miratuara për vitin 2024, ka kryer punimet fushore gjatë periudhës qershor – tetor të këtij viti. Gjatë këtyre vrojtimeve, sipas fushës së veprimtarisë së SHGJSH dhe tematikës së projekteve, qëllimi i punimeve ka qenë:

• Saktësimi i ndërtimit gjeologjik, karakteri i marrëdhënieve të serpentiniteve me llojet e tjera shkëmbore, mineral mbajtja dhe të dhëna mbi rolin që ato luajnë në aspektin gjeomjedisor i daljes së serpentiniteve, vrojtime gjeologjike në territorin e sipërcituar.
• Vrojtime, monitorime, i punimeve gjeologjike për vepra inxhinierike dhe të kërkim zbulimit të kryera nga të tretë ose me financim publik (të tuneleve te hidrocentraleve, punimeve minerare kapitale, rrugëve kombëtare, etj.)
• Monitorimi i veprimtarisë minerare të lejeve të kërkim-zbulimit, me qëllim zbulimin e rezervave të reja dhe vënien në eficensë të pasurive tona minerale.

• Vlerësimi e rivlerësimi gjeologo-ekonomik i mineraleve kryesorë (krom, bakër, hekur-nikel, nikel-silikat, mineralet e tokave te rralla, mineralet e lendeve te para kritike e të çmuar, etj.).
• Monitorimi dhe rivlerësimi sasior e cilësor i rezervave të ujërave nëntokësore (me përparësi vlerësimin dhe rivlerësimin e ujërave nëntokësore për furnizimin me ujë të pijshëm), gjendja dhe shfrytëzimi i tyre në basenet kryesore të vendit.
• Studimi dhe monitorimi i dinamikës së lumenjve (qëndrueshmëria e shtretërve dhe anëve të lumenjve, erozioni i brigjeve, sedimentim-akumulimi, vlerësimi i impaktit mjedisor), masat parandaluese dhe rehabilituese për mënjanimin e dëmeve nga aktiviteti natyror apo ai i shfrytëzimit pa kriter të shtretërve të lumenjve.
• Studime për përcaktimin e zonave të mbrojtjes higjeno-sanitare për kaptazhet që përdoren për furnizim me ujë të pijshëm.
• Rivlerësime dhe përgjithësime të resurseve hidrokarbure me synim zgjerimin e perspektivës së shfrytëzimit të tyre.

• Vlerësimi e monitorimi i fenomeneve gjeodinamike të digave të rezervuarëve ujëmbajtës, nëpërmjet metodave gjeologo – inxhinierike dhe gjeofizike. Evidentimi dhe pasqyrimi i fenomeneve gjeodinamike me impakt social.
• Studime te detajuara për zonat urbane, si rajonizimi gjeologo-inxhinerik i qyteteve dhe zonave me përparësi zhvillimi.
• Monitorimi i vijës bregdetare, studimi i dinamikës dhe zhvillimit së vijës bregore, përfshirë deltat e lumenjve, dhe lagunave dhe ndikimet e ndërsjellë tek njëra – tjetra.
• Studime dhe vrojtime te litologjisë së substratit dhe pasurive të ndryshme detare e nëndetare e bregdetare.